Sampurasun...
Dina babad Sumedanglarang seueur nu teu ka cutat dinu sajarah, dina mangsa burakna Pajajaran di Kadu Hejo Pandeglang Banten mangsa Prabu Nusiya Mulya / Prabu Nilakendra / Prabu Seda / Panembahan Pulosari / Prabu Haris Maung, nu sajaman sareng Ratu Pucuk Umun Sumedang (Ratu Inten Dewata / Ratnasih) ti carogena Pangeran Santri (Rd. Sholih).
Saperti carita rahayat (floklore) Babad Pajagan Dusun Cicau Desa Pajagan Kecamatan Situraja nyaeta Layang Dikusumah atanapi Ki Ajar Gede (Mbah Gede), sareng rayina Mayang Kusumah atanapi (Eyang Ambu) teureuh Pajajaran ti Kabataraan Gunung Pancar Bogor, Babad Situraja Buyut Merah, Babad Cipancar Kecamatan Sumedang Selatan Sutra Ngumbar (Prabu Madu Ucing) teureuh ti Pajajaran oge, Babad jeung buk Ki Sukawayana Cimalaka, nyaeta Rd. Aji Mantri Putrana Prabu Nusiya Mulya, Rd. Aji Mantri puputra Santowan Jagabaya nu di Nangtung Sumedang, nu teu acan ka galuar sadayana mangsa Nagara Pajajaran Burak kualatan ayana parebutana tahta dina jero kulawargana keneh (Penyerangan Karaton Pajajaran di Pulosari Pandeglang nu dirurug ku Wadya Balad Banten - Cirebon - Demak)
Kasebut dina Babad Pajagan (Paku Danghyang Pangjagaan) nu kasebat Hyang Ambu atawa Nay Mas Maya-Hyang Kusumah (Mayang Kusumah) tedak terah Pajajaran Tengah, putri bungsu ti lima putra-putri Prabu Batara Kusumah nu linggih di Kabataraan Pajajaran Gunung Pancar Buana Bogor, nu limaan téh nyaéta :
1. Layang Dikusumah / Mbah Gedé, mangku kalungguhan Guru Wisesa kalayan gelar Ki Ajar Gedé.
2. Jaya Kusumah, kapeto kawasa jadi Kandaga Lanté Pajajaran kalayan gelar Prabu Jaya Prakosa / Mbah Jaya Perkosa.
3. Raksa Kusumah (Saburakna Pajajaran taya laratan)
4. Ni Mas Lénggang Kusumah (saburakna Pajajaran taya laratan)
5. Ni Mas Mayang Kusumah
Dina Babad Pajagan (Pangjagaan) ngeunaan salah sawios tokoh anu ka telahna Mayang Kusumah atanapi Sanghyang Ambu (Eyang Ambu), mantena rayi Layang Dikusumah atanapi Ki Ajar Gede (Mbah Gede) rai-raka sareng Jaya Prakosa ti Pajajaran nu ngiring sareng rombongan 4 Kandaga Lante basa masrahkeun Makuta ka Sumedang. Nyi Mas Mayang Kusumah, kacarioskeun anjeunna masih parawan kapalang basa kedah lunta ti Pajajaran ngiring sareng ingkang raka-rakana, rombongan 4 Kandaga lante alatan nagara burak - Pajajaran runtag, ari jalan anu ditempuh ku rombongan malibir mapay sisi basisir laut kidul, awalna ti wilayah Jampang Kulon (Kadu Hejo - Pulosari, Pandeglang) tempat panungtungan Prabu Nila Kendra / Prabu Nusiya Mulya / Prabu Seda / Panembahan Pulosari, lungsur uga wangsit, tapak tilasna ayeuna janten "Jalan Lintas Selatan" ti Pandeglang (Karaton Pulo Sari baheula) ka Jampang teras Sancang teras Garut (tapakna di Limbangan Garut aya Situs Pangeureunan, tempat istirahatna wadya balad Pajajaran) parat ka Batu Karas, malibir ka pasisian kidul sasat ngahaja nyingkahan pasukan musuh nu harita ngarurug nagara gabungan Demak, Cirebon sareng Surasowan Banten, maksad bade nepangan salah sawios sesepuh Pajajaran anu mukim di Limbangan nyatana Sunan Rumenggong (Prabu Layaran Wangi atanapi Bujangga Manik) anu di pancenan ngadegkeun Nagara Kerta Rahayu (Nagara Darurat) Limbangan Garut.
Opat Kandaga Lante maksad nyuhungkeun kamandang saran bongbolongan bubuhan Sunan Rumenggong hiji sesepuh nu jembar luang pangalamannana, nya di dinya cariosna gelar sawala anu hasilna mufakat para sesepuh nyatujuan Makuta dipasrahkeun ka Sumedang najan teu saeutik anu teu saluyu tur ngaragukeun kana kasanggupan Sumedang geusan neruskeun tongkat estapet Kajayaan Pajajaran, tapi bahasa para sesepuh :
Cariosna di Limbangan Nyimas Mayang Kusumah tepang sareng saurang jajaka turunan Sri Batari Hyang ti Galunggung, duanana papada katarik geter simpati abong papada keur meujeuhna sengserang panon, sahingga eta jajaka ngiring sareng rombongan ka Sumedang, ku sabab perwatekna eta jajaka nu teuneung ludeung, leber wawanen tur parigel dina olah kanuragan sahingga digelaran Kadiran (wanian), nalika Patih Jaya Perkosa dipaparinan pancen masrahkeun serat talaq Ratu Harisbaya ka Pangeran Giri Laya Cirebon, Patih Jaya Prakosa ngatur siasat keur ngajaga sagala kamungkinan, diantarana nyusun pasukan anu dipingpin ku Eyang Terong peot, Eyang Nangganan sareng Eyang Wirajaya di wewengkon Tomo bisi Cirebon malik ngarurug Sumedang, salian ti eta Patih Jaya Prakosa ngayakeun Barisan Pangjagaan ku nyiapkeun Pasukan di wilayah Pajagan kanggo ngamankeun Eyang Gusti Sunan Pada (mertua Prabu Geusan Ulun) anu asalna mangkuk di makam Waru - Karedok diamankeun ka tonggoh ka wilayah anu disebat Pageur Ageung sagedengeun Gunung Cangkuang, Gunung Kendal sareng Gunung Jayagung.
Mbah Gedé (Layang Dikusumah) lungsur deui ka Eyang Kadiran (Carogé Nyimas Mayang Kusumah) mangsa mingpin pasukan Barisan Pangjagaan Pager Ageung keur ngamankeun Sunan Pada (Mertua Eyang Prabu Geusan Ulun) tina ancaman pasukan Cirebon tur sagala kamungkinan nalika Eyang Jaya Perkosa ngélék pancén ngajukeun talak Ratu Harisbaya ka Cirebon, nya Eyang Gusti Sunan Pada dipundut ngalih ti Padépokan Waru (Karédok), dialihkeun ka tonggoh ka wewengkon nu geus disayagakeun nu disebut Pager Ageung (Kiwari Cisahang), antara Kendal Gunung, Jayagung, Gunung Cangkuang jeung Gunung Leutik.
Ieu Barisan Pangjagaan dijieun 3 Lapis :
1. Daerah Pageur Ageung (Pangjagaan) dipingpin ku Ki Ajar Gede (Layang Dikusumah) salaku Panglima Jurit (Komandan Kompi). Eyang Kadiran salaku Hulu Jurit (Komandan regu) didamping ku Sanghyang Ambu anu harita tos janten garwana. Eyang Perbu ditugaskeun di Kendal, Buyut Purugul di Gunung Cangkuang, Eyang Kaula Jaya Kula Maya di Cipipisan tur Embah Suba di Gubrul.
2. Daerah Jami Bakih (Cilopang) dipingpin ku Embah Sacadinanga, Buyut Kalong jeung rengrengannana.
3. Daerah Pager Rucukan (Situraja) dipingpin ku Buyut Merah jeung rengrengannana.
Sumangga kanggo nu teu acan uningga Babad Pajagan Dusun Cicau Desa Pajagan Kecamatan Situraja Sumedang.
Cacap dibersihan disapuan paska karungkup ku pangpung gedé nu murag tunjangeunana, bahan bacaeun keur nu "ngaraku-ngaku turunannana" tapi mopohokeun mulasara hunjuranana adigung asa aing pucuk jangkung gedé pangpung katungkul ku kalakay bari poho kana tutunggul...
Cag ah Rampes.
